cartas de amor

O NOSO ESPAZO

miércoles, 13 de marzo de 2024

8 M: Día Internacional da Muller

O pasado 8 de marzo, celebrouse o Día Internacional da Muller. Para celebrar dita conmemoración, os alumnos e alumnas de sexto de Educación Primaria, fixeron varias exposicións nas que presentaron a mulleres referentes en distintos ámbitos como Isabel Zendal, Concepción Arenal, Margarita Salas ou Rita Levi, entre outras. 

A partir destas presentacións todo o alumnado puido coñecer os logros destas grandes profesionais. 




 A maiores e durante todo o mes de marzo, no recuncho de Miroleo Recomenda, atoparedes exemplares con biografías de mulleres que cambiaron a historia. Achegádevos a lelos!

jueves, 29 de febrero de 2024

DÍA DE ROSALÍA

Como ben sabedes, o pasado venres,  23 de Febreiro, celebrouse o Día de Rosalía. Para conmemorar dita celebración, dende o centro,  realizáronse varias actividades.

Por unha parte, dous alumnos de quinto, Saleta e Mario, acudiron ao Teatro da Estrada para participar no recitado de poemas de Rosalía, xunto con estudantes doutros centros do concello. O poema elixido polo noso alumnado, nesta ocasión,  foi Campanas de Bastabales.


Ademais, durante o acto presentouse o vídeo Un pelouro que roda. Videoclip gravado e musicado por A Banda da Loba, do que o noso alumnado tamén é protagonista. Animámosvos a velo!


Seguindo con actividades adicadas a esta conmemoración. Durante a xornada de onte, os alumnos e alumnas de cuarto fixeron unha presentación sobre a escritora, achegando datos sobre a vida e obra desta importatísima poetisa.



Finalmente e para concluír, aproveitamos a xuntanza para repartir as mochilas viaxeiras, cargadas de xogos e lecturas, para que tanto nenos como familias, desfruten da lectura dende os fogares.

jueves, 22 de febrero de 2024

DÍA INTERNACIONAL DA MULLER E DA NENA NA CIENCIA

Co motivo do Día Internacional da Muller e a  Nena na Ciencia recibimos na nosa biblioteca a Dilia Martínez. Trátase dunha médico de emerxencias que acudiu ao noso centro para contarnos en que consiste o seu incrible traballo, posto que non se trata dunha sanitaria común.  A nosa convidada viaxa por todo o mundo exercendo a súa profesión, Mozambique ou A Antártida, son só dous exemplos da multitude de lugares que coñeceu grazas ao seu traballo. Estes viaxes permitíronlle coñecer a fauna de cada país, sendo este un dos aspectos que máis chamou a atención do noso alumnado.

Encantounos coñecer a súa motivadora historia!




jueves, 15 de febrero de 2024

CELEBRAMOS O ENTROIDO

Chegou Febreiro e con el o esperado Entroido!E que mellor maneira de festexalo que disfrazándonos tódolos días?

A comezos de semana, foi o Meco o encargado de dar ordes relacionadas co proxecto do cole, “A volta ao mundo”, dando as indicacións dos complementos  que deberíamos traer de luns a mércores.

O xoves, e tamén relacionado co proxecto, en concreto, ca temática mariña, os diferentes cursos, amosamos as orixinais vestimentas que se foran creando en cada aula ó longo deste mes. Así, os máis cativos de Infantil vestíronse de mariñeiros, 1º e 2º de gondoleiros, 3º e 4º foron de piratas, mentres 5º se disfrazou de viquingos e , por último, os alumnos e alumnas de 6º convertéronse nos reis do mar, sereas, cangrexos e cigalas.








Todo isto, acompañado da divertida actuación do músico Paco Nogueiras.



Para rematar, degustamos as diferentes sobremesas  preparadas polas familias. Estaba todo delicioso!


jueves, 1 de febrero de 2024

ENTROIDO


CHEGOU O ENTROIDO🎭🎭 
 
ESTADE MOI ATENT@S ÁS ORDES DO MECO PARA DAR A VOLTA Ó MUNDO🌎

 

DÍA ESCOLAR DA NON VIOLENCIA E A PAZ

Como ben sabedes, o pasado martes 30 de xaneiro, celebrouse o Día Escolar da Non Violencia e a Paz. Para celebrar dita conmemoración, o noso alumnado preparou varias actividades.

Por unha banda, o alumnado de 5º e 6º de Educación Primaria, encargouse da elaboración dunha presentación do máis completa sobre este día, abordando diversas cuestións: por que se celebra este día, símbolos da paz, persoaxes que recibiron o Premio Nobel, entre outras moitas.



Por outra parte, os alumnos e alumnas de 3º e 4 º representaron a obra “Todo é un conto”, obra que transmite unha mensaxe moi axeitada para dito día.







Para rematar, todos os nenos e nenas do cole interpretaron a canción “EPO E TAI TAI E”





miércoles, 17 de enero de 2024

OBRADOIRO DE RADIO CON CRISTINA COLLAZO

Durante esta xornada tivemos a gran sorte de contar no centro coa visita da actriz Cristina Collazo. Cristina acudiu ó colexio para impartir un taller de radio, pero como ben sabedes, a radio esixe dunhas prácticas previas á gravación, para que o resultado sexa o mellor posible.

Deste xeito, durante o día de hoxe, Cristina ensinounos exercicios e técnicas de quentamento vocal e corporal, de respiración, concentración e improvisación. Todo a partir de xogos divertidísimos, cos que o alumnado desfrutou enormemente.

Unha vez feito isto, puidemos comezar a preparar os contidos e a programación de dito programa de radio, cuxa gravación se levará a cabo na próxima visita. 

Estamos desexando que chegue ese día!

Para finalizar, amosámosvos algunhas fotos das actividades levadas a cabo. Para velas todas só tedes que clicar aquí.